Fil-ktieb ta’ Danjel Kapitlu 3 naqraw kif is-Sultan Nebukadnessar bena statwa tad-deheb bħala sfida għat-tifsira tal-ħolma li qrajna dwarha f’Kapitlu 2. Għalhekk l-istatwa li bena, kienet kompletament tad-deheb u mhux rasha biss, bħal f’ dik tal-ħolma.
B’dan l-att ta’ kburija, wera li kien qed jirrifjuta li jaċċetta n-natura temporanja tas-saltna tiegħu u prova juri li l-ħakma tiegħu kellha tkun eterna.
Is-sultan hedded li joqtol lil dawk li jirrifjutaw li jaduraw lil din l-istatwa billi jitfagħhom f’forn tan-nar.
Sidrak, Mesak, u Għabednego, (Lhud eżiljati), baqgħu lejali lejn Alla u m’obdewx.
Huma ntefgħu f’forn, imma ħarġu kompletament bla ħsara. Dan wassal lil Nebukadnessar biex jirrikonoxxi lil Alla tagħhom u jagħtihom uffiċju ogħla fil-Babilonja.